"انت تقود سيارتك في ليلة عاصفة في الصحراء!
وفي طريقك رأيت ثلاثة أشخاص ينتظرون طريقه للرجوع
1) امرأة عجوز توشك على الموت.
2) صديق قديم سبق أنقذ حياتك.
3) الفتاه المثالية والتي كنت تحلم بالزواج طوال العمر.
كان لديك متسع بسيارتك لراكب واحد فقط .. فأيهم ستقول له اركب ؟!"
السؤال قد يبدو محير جدا في الأول
أول مره قابلني قعدت افكر في اجابه ليه بكل السيناريوهات الممكنه
ارد الجميل لصاحبي ؟!
و لا انقذ الست ؟!!!
و لا اخد الفتاه و مضيعش الفرصه ؟!!!!
كواحد شهم -مشيها المره دي معلش- قلت اكيد هاخد المرأه العجوز: منطقي جدا و صاحبي أكيد هيتعرف على البنت و هبقى اخد منه رقمها لما اشوفه تاني .. بس ضميري قعد يخبط فيا و يقولي "و صاحبك؟! هتبيعه ؟!!".
اخد صاحبي: ضميري المره دي شدني من شعري .. "هتسيب الست الكبيره يا مغفل ؟!!! و هتسيبها مع فتاه ضعيفه مكسورة الجناح لوحدهم ؟!! يعني هتعمل كارثتين ؟!!".
الفتاه: صاحبي اكيد هيعرف يتصرف و يوصل الست الكبيره و ابقى اكلمه بعد كده و اكيد هيُقدر موقفي -حلو الحل عارف :D- .. ضميري ما صدق و مسكتش طبعا .. يعني هتبيع اكتر اتنين المفروض تكون معاهم ؟!!!.
قلت لنفسي ما تفكر بعقلك بدل التفكير طريقة سومه العاشق دي .. و هنا كانت الكارثه...
فكرت أخد البنت: هو انا يعني اول ما اقولها انتي فتاة العمر هتروح راميه نفسها في حضني ؟!! .. طيب افرض كانت مخطوبه ؟!!! .. افرض ابوها موافقش عليا ؟!!! .. و بعدين انا لازم كده ابيع العربيه عشان اجيب شقه تلمنا .. جيت عند السيناريو ده و قلت لنفسي "هي اصلا تستاهل حد أحسن مني" :P.
أخد المرأه العجوز: طيب ما هو قايل الست على وشك الموت .. يعني هتموت قبل ما نوصل للمستشفى .. و لو صاحبى عرف ينقذ البنت و اعجبت بيه .. هعمل انا ايه ساعتها بقى ؟!! يبقى هخسره و هخسر البنت (اتفرج على فيلم عن العشق و الهوى هتفهمني :P) .. ساعتها هبقى مكسبتش حاجه !!.
أخد صاحبي: طيب ماهي الست هتموت مع البنت .. و كفتاة احلامي البنت لازم تكون رقيقه .. تخيل واحده رقيقه معاها جثه لوحدها في الصحرا .. محبتش اكمل تخيل في الموقف ..
يبقى اعمل من بنها -مع اعتذاري لأي حد من بنها- و كأني مشفتش حد و اكمل طريقي .. ساعتها صاحبي هيكون مشغول مع الست الكبيره فمش هيعرف يركز مع الفتاه .. و هي هتروح تحاول توقف اي حاجه معديه و هتبعد عنه .. و ان شاء الله هيلاقو اتوبيس معدي ياخدهم.
لسه جاي اكتب الحل ده .. كانت الصدمة الكبيره لما قريت الرد الذكي -على حد رأي واضع السؤال- و هو "ادي العربيه لصاحبي يوصل العجوز و افضل انا مع الفتاه".
و نتحرق بقى انا و هي في الصحرا !!...
بعد تفكير طويل تاني ملقيتش غير حل واحد...
أعمل من بنها و لا كأني قريت السؤال !!!
بس الشئ اللي جيه في دماغي متأخر
عربية ايه دي اللي مش فيها غير مكان واحد ؟!!
رايح الصحرا بتوكتوك ؟!!!
------------
قال رسولنا الكريم صلى الله عليه وسلم :" أقربكم مني مجلسا يوم القيامة أحاسنكم أخلاقا " و " ليس منا من لم يوقر كبيرنا ويرحم صغيرنا ".
ما إجابتك على السؤال الأن ؟
ليست هناك تعليقات:
إرسال تعليق