كانت حاجه غريبه جدا انك تروح لجنتك الانتخابيه تلاقي طابور لاخر الشارع .....
و انا داخل علي لجنة الانتخابات الساعه 8 الصبح تاني يوم
لقيت طابور طويل فعلا
مصدقتش نفسي و وقفت في اخره
فضلت ربع ساعه و لسه متحركش خطوه
سألت اللي قدامي: هو مبيتحركش ليه
قالي: دي اللجنه لسه مبدأتش !!!
هنا عرفت ليه الطابور كان طويل بالشكل ده
بس قلت لنفسي السنه اللي فاتت لو جمعت اللي انتخبوا في مصر كلها مكانوش هيجمعوا الطابور ده
حصل تغيير كبير في مصر الحمد لله ....
طبعا الطابور كان طويل بطريقه ممله
الناس بدأت تكلم بعضها بقي
واحد عاجوز قال: ماهو كله من النيه المنيله بتاعتنا .. مش قلنا هنشوف اول يوم لو مفيش ضرب هنروح تاني يوم !
هي النظريه كانت غريبه
فسألته: طيب انت جاي ليه اصلا ؟
رد و قالي: عشان ال 500 جنيه !!!
سألت اللي ورايا: و حضرتك؟
نفس الرد: عشان ال 500 جنيه
و اللي و راه ... و اللي وراه
هنا عرفت .. اللي طلع اشاعة ال 500 جنيه ده واحد عبقري
(اراهن علي فكره انها اشاعه مش اكتر)
و بعدين بدأوا يتكلموا شويه علي الاوضاع في مصر
و احد كبير شكله عاقل كده قدامي بدأ يتكلم
العاقل: مصر دي افقر بلد عربيه -نسي الصومال- كل البلاد اغني مننا قطر و البحرين و السعوديه
هو: الاحصائيات بتقول ان في عندنا 45 في الميه تحت نسبة الفقر يعني احنا لو 85 مليون عندنا 45 مليون تحت نسبة الفقر !!
و سكت شويه و كمل: مع ان عندنا احسن ناس .. علماء و دكاتره و كل حاجه ده حتي الشباب لما عملوا ثوره بقيت بتتدرس دلوقتي في الحكومه الامريكيه ربنا ينتقم منك يا حسني علي اللي عملته فينا.
بعد دقيقه من السكوت مر علينا واحد ظريف و سأل: انتو مستنين السكر ؟
كأن الراجل العجوز افتكر مره واحده و قال: ده حتي الزيت بتاع التموين اللي بناخده ده بواقي الزيت اللي الشركات بتقلي بيه البطاطس .. انتو مش شايفين شكله عامل ازاي !
و بعد كده كمل: الحاجات دي مبهدله صحتنا ده الواحد اللي بيتجوز 30 سنه بييجي بعد سنتين مراته عايزه تطلق و تقولك "مش متفاهمين" (الربع الساعه الجايه لازم تتقص عشان الرقابه) ..................
عدي واحد بتاع الاخوان بيشرحلنا ازاي ننتخب و مين تبع الاخوان و كده
بعد ما مشي الراجل اللي ورايا بدأ يتكلم: ده حتي الاخوان طلعوا بيتمولوا من روسيا .. الواحد مبقاش عارف يثق في مين !!
معرفتش امسك نفسي بصراحه و سألته: عرفت منين؟
رد و قالي: توفيق عكاشه قال كده امبارح.
(بصراحه مصدقتش نفسي ان في حد بيصدق الراجل ده و واخد كلامه علي انه موثوق فيه كده بس قلت اكمل و خلاص)
رديت انا كمان: توفيق عكاشه اللي قال متنتخبوش البرادعي عشان مش بيعرف دكر البط بيتزغط ازاي؟
بص في الارض و قالي: ماهو حتي لو كان غلط محدش بيعرف يرد عليه .. عمرك شفت حد بيرد عليه؟
معرفتش امسك نفسي من الضحك و قلتله: هو محدش عايز يرد عليه عشان عارفين ان محدش بيصدقه .. بمعني اصح بيكبروله.
(كان خطأ مني اعترف في الحوار)
اتنرفز و قالي: محدش بيصدقوا !! .. امال اللي نازلين معاه العباسيه دول ايه
هنا كان يا اما هدخل في حوار حسني مبارك كان وحش و لا كان حلو و دي حاجه في منتهي الملل يا اما هتقلب بخناقه منه فالكلام مكنش ليه لازمه .. فسكت.
و هنا كمان الطابور بدأ يتحرك و اتحركنا معاه فالموضوع عدي
و انا طالع انتخب لقيت راجل عجوز فعلا طالع السم ينتخب و ماسك عصايه و ماشي بالعافيه
فسألته: انت جاي ليه يا حاج؟
(كنت متوقع بردو عشان ال 500 جنيه)
قالي: عشان انتخب
سألته: مين؟.
قالي: اللي جاي انتخبه بقي....
في الغالب يا اما مكنش عارف فعلا هينتخب مين يا اما عنده وعي و انا اللي معنديش
و انا شايف التانيه اقرب للحقيقه .....
انتخبت في الاخر .. و رجعت في رأيي في اخر لحظه و منتخبتش حزب العدل زي ما كنت ناوي ....
مش هعرف اقول طبعا انتخبت مين ...
خلاص اتعلمت ......
الملخص
الموضوع محتاج نظام اكتر.
حكاية ال 500 جنيه دي جابت ناس كتيييييييييييييييير.
في ناس بتصدق توفيق عكاشه !!!!.
في امل ان شاء الله.
ليست هناك تعليقات:
إرسال تعليق